ملك وكتابة

ملك وكتابة 

قعدوا مع بعض قدام ترابيزة الكمبيوتر عشان يفرجها على صور الخطوبة . لفت نظرها صورة لوالده محطوطة فى برواز جنب الشاشة .. فسألته :

-إنت ليه مش عاملها كبيرة ومعلقها فى برواز ؟

قال لها : السبب الحقيقي مش هينفع أقوله .

- طب عشان خاطري ..

: عشان لو دماغي راحت كده ولا كده ابصلها وافوق لنفسي .

- أه .. فهمت .

مسك البرواز وخلع المسند بتاعه وركبه من قدام (بقى الضهر هو اللى باين) ..

: شوفي كده ..

بصت لقت ضهر البرواز متركب فيه صورتها ، اتفاجأت ومعرفتش تتكلم .

: أنا بقلب البرواز ع الناحية التانية لما بزهق واتعب من كتر الشغل .. وأول مبشوفك تعبى بيروح واحس انى ممكن اشتغل 100 سنة ورا بعض .

مسك إيدها فى اللحظة دى .. وشها احمر ومقدرتش تبص فى عينيه راح سايب إيدها ورجع مسند البرواز زى ما كان ، بص لابوه فى الصورة وقال له :

- منور يا حاج .